Como podedes comprobar no mapa de Google, Couso atópase nun val a uns 300 metros de altitude rodeado de montes, orientado ao norte, e con saída natural seguindo a estrada que vai a O Confurco (na foto a estrada cara ao norte que para por diante dunha canteira), comunicándonos coa N-120. Polo extremo sur chegamos ao alto de San Martiño e temos una forte baixada cara ao resto da parroquia de Guláns. Por ámbolos dous extremos estamos a 2,5 quilómetros de infraestructuras de comunicación importantes. Polo leste e polo oeste, rodéannos montes de 425 metros de altitude, aproximadamente, entre os que se atopan os montes dos Penedos de San Cibrán.

A parroquia: Guláns

Guláns ten unha superficie de 1.082,5 ha, unha poboación de 826 habitantes e a compoñen os seguintes lugares: A Abesoureira, O Aciviñeiro, Arrabal, A Barxa, Barreiro, Casal, A Cima, Costa de Sequeiros, A Costa da Groba, Couso, Devesa, O Eido Vello, Lameiro, O Outeiro, O Outeiro do Foxo, O Padrán, Pereiro, Porto, O Provizo, O Salgueiral, Santa Baia, Souto, Suaviña e Valiñas.

Limita ao N. con Xinzo, Arnoso e Areas, con Picoña (Salceda de Caselas) e Cristiñade ao S., ao L. con Angoares e Cristiñade, e con Cans e Atios (O Porriño) ao O. Guláns destaca polas súas hortalizas e por ser cuna de afamados músicos. Tamén destacan os Ranchos dos Reises, que bailan e cantan os días 6 e 7 de xaneiro.

É unha parroquia eminentemente rural e que aínda conserva bos exemplares de arquitectura popular, petos de ánimas, cruceiros, algunhas capelas e muíños.